МБОУ «Ювановская СОШ» (СП с. Малое Карачкино)

Театр вăл - искусство университечĕ, туйăм академийĕ. Унта кĕрсе ларнă этемĕн хăйне валли халиччен пĕлмен ăслăлăха, халиччен курман туйăма ăша илет. Искусство чи малтанах ҫынна туйăмсем витĕр Çын тăвать. Кулленхи пурнăҫра этем кулленхи туйăмсемпе пурăнать. Театр вара этем чун-чĕрине сасартăк тарăнлатса ярать. Кунта пурте тĕлĕнмелле! Тарăн шухăшлă лайăх спектакль пынă чух ҫын хăй те сисеймест, савăнма, кулянма пуҫлать.

Шкулта кашни ҫулах «Чӑваш чӗлхи эрни» ирттересси йӑлана кӗнӗ. Кӑҫал уяв ака уйӑхӗн 24-мӗшӗне  уҫӑлчӗ. Ҫак эрнене ачасем виҫҫӗмӗш чӗрӗк пуҫлансанах хатӗрленме пуҫларӗҫ. Уява шкул çумĕнчи ача садне çÿрекенсенчен пуçласа аслăрах класра вĕренекенсем те, учительсем те хутшăнчӗҫ.

Ачасене килӗшекен, хавхалантаракан мероприятисенчен пĕри - «Театр-пирӗн уяв» конкурс. Конкурса ирттересси пирĕн шкулта  йӑлана кӗчӗ.  Ҫак уява ачасем питӗ кӗтрӗҫ, хавхаланса хатӗрленчӗҫ. Рольсене хатӗрленнӗ май произведенийӗпе тӗплӗнрех паллашрӗҫ, декорацисене пуҫтарчĕҫ, костюмсем хатĕрлерĕҫ. Ку ӗҫе тума, паллах, ашшӗ-амӑшӗ  те пысӑк пулӑшу пачӗ. Паянхи уява ачасем питĕ тĕплĕ хатĕрленнĕ. Шкул сцени ҫинче чăн-чăн артистсем выляҫҫĕ тейĕн. Тĕрлĕ жанрлă произведенисем хатĕрленĕ ачасем: Т. Петĕркки ҫырнă «Çутталла» пьеса сыпăкне 5-мĕш классен кăтартрĕҫ, К. В.Ивановăн «Нарспи» поэма сыпăкĕпе 8-мĕш класра вĕренекенсем сцена ҫине тухрĕҫ, П. Эйзин ҫырнă  «Упа керменĕ» юмахĕ пурне те килĕшрĕ, 1,3 классенче вĕренекенсем И. Яковлев ҫырнă «Уҫăлма тухнă шăши ҫури» юмахне ăста вылярĕҫ, 6-мĕш класра вĕренекенсем «Икĕ енлĕ пурнăҫ» пьесипе куракансене савăнтарчĕҫ. Савăн пекех сцена ҫинче чăваш поэчĕсем ҫырнă илемлĕ сăвăсем янăрарĕҫ. «Театр-пирӗн уяв» конкурс чӑн-чӑн сцена ӑстисен уявӗ пек иртрĕ.