Иртнӗ шӑматкун Муркаш муниципалитет округӗнчи Калайкасси вӑтам шкулӗнче республика шайӗнче «Чӑваш ачи чӑвашах» фестиваль иртрӗ. Кӑҫал ӑна Чӑвашсене ҫутта кӑлараканӗ тата педагог - Иван Яковлевич Яковлев ҫуралнӑранпа 175 ҫул ҫитнине, Раҫҫей Федерацийӗнчи Вӗрентекенпе Вӗрентӳҫӗ ҫулталӑкне тата Чӑваш Республикинчи Телейлӗ ачалӑх ҫулне халалласа 7-мӗш хут йӗркеленӗ.  Çак пысӑк мероприятине Пушкӑрт шкулӗнчен те пухӑнса инҫе ҫула кӗскетсе хутшӑнтӑмӑр.

Шкулта Е.Е. Ерагин пухса йӗркеленӗ шкул музейӗ, Афган вӑрҫине халалланӑ музей, Тури чӑвашсен музейӗ хатӗрленӗ Чӑваш Республикин патшалӑх символӗсем 25 ҫул тултарнине халалланӑ куравпа тата «Чӑваш сурпанӗсем» фотокуравпа, шкул вулавӑшӗнче йӗркеленӗ Зинаида Васильевна тата Петр Яковлевич Мазуркинсен куравӗпе паллашрӑмӑр.

Ирех вӑйӑ картине пуҫтарӑнса карталанса утрӑмӑр та фестиваль янравлӑн уҫӑлчӗ. Уявра пурте шурӑ, сарӑ, хӗрлӗ тӗрӗллӗ чӑваш тумӗсемпе капӑр, илемлӗн, шукӑль, сӑпайлӑн курӑнчӗҫ. Кайран хӑнасем, хаклакансем, куракансем, хутшӑнакансем тватӑ ушкӑна пайланса тӗрлӗ секцисенче вӑй виҫрӗҫ.

 1-мӗш секцинче «Вӗрентетпӗр чӑвашла» 14 вӗрентекен чӑвашла уроксем ирттерчӗҫ. Жюри членӗсем чи пултаруллисене - акӑлчан чӗлхипе математика урокӗсене кӑтартнӑ вӗрентекенсене Тав хучӗпе палӑртрӗҫ.

2-мӗш секцинче «Савӑнатап эп чӑваш пулнишӗн» икӗ теҫеткене  яхӑн пухӑннӑ пуҫламӑш классен ушканӗсем вӑйӑсем кӑтартса ӑмӑртрӗҫ. Кунта Пушкӑрт шкулӗнчи 1 тата 3 классенче вӗренекенсене хаклакансем иккӗмӗш вырӑнпа савӑнтарчӗҫ.

3-мӗш секцинче «Сар каччӑпа сарӑ хӗр» ӑс-тӑн енчен яш-кӗрӗм вӑй виҫрӗ. Чи тавҫӑруллисене Тав хучӗпе тивӗҫтерчӗҫ.

4-мӗш секцинче «Тӑвалла пулсан та малалла» шкул директорӗсемпе ун ҫумӗсем ӗҫлерӗҫ. Кунта Луиза Варсанофьевна Федосеевӑпа Светлана Ивановна Тобоева «Театр – пирӗн уяв» проекта хутӗлерӗҫ. Вӗсен ӗҫне чи пысӑк хак парса чысларӗҫ.

Çапла майпа пушкăртсем чӑвашлӑха аталантарас ӗҫ вӑйланса пытӑр тесен, тӑван чӗлхене упраса хӑварас ӗҫре, веҫех пирӗнтен кашнийӗнчен килнине, эпир ӑна тивӗҫлӗн тытса пыма пултарассине  курса ӗнентӗмӗр. Чӑваш Республикин поэчӗ Раиса Сарпи, Галина Телей юрӑҫ тата композитор, Эдисон Патмар ҫыравҫӑ каланисем: чӑваш чӗлхине юратмалли тата ытти халӑх чӗлхине хисеплемелли, ачасем, вӗсен ертӳҫисем чӑн-чӑн чӑвашсем пулнине мухтаса сӑвӑласа та, юрласа та, ташласа кӑтартса калаҫрӗҫ. Хамӑр та курса тӗлӗнтӗмер, хамӑра та, хамӑрӑн пултарулӑха та кӑтартма пултартӑмар. «Театр - пирӗн уяв» ятпа, ав, Пушкӑрталла ҫитме тӗв турӗҫ пухӑннисем. Мӗнех, хапӑл тусах кӗтетпӗр!