Пушкӑрт шкулӗнчи 1, 3, 5-мӗш класри ачасем хӗл сиввине парӑнтарса Шупашкарти Чӑваш театрӗнчи Çӗн ҫул уявне ҫитсе килчӗҫ. Кунта чӑваш чӗлхипе литературине вӗрентекенсем С.И. Тобоева, М.В. Якимова, чи лайӑх вӗренекенсем, «Маска» кружокне ҫӳрекенсем кайма пулчӗҫ. Хапӑл туса кӗтсе илчӗ 105 ҫулхине палӑртакан К.В.Иванов ячӗллӗ Чӑваш академи драма театрӗ. Çавӑнпах театрти историре  юлнӑ вырӑнпа вӑхӑт пирки пире Чӑваш халӑх артисчӗ Г.П. Медведев каласа пама кӑмӑл турӗ.

- Пирӗн Чӑваш театрӗ аслисенчен пӗри. Тепӗр уйрӑмлӑх – СССР халӑх артисчӗ ятне 4 ҫынна панӑ. Вӗсем А.К. Ургалкин, Б.А. Алексеев, В.К. Кузьмина, В.Н. Яковлев. Чӑваш Енре 3 «Ылтӑн маска» хуҫисем – В.К. Кузьмина, В.Н. Яковлев тата Н.В.Федоров Театр ӗҫченӗсен пӗрлешӗвӗн ертӳҫи А.А. Калягинран тивӗҫлӗ пулнӑ. Ачасем! Чӑвашсен историйӗ пуян, иксӗлми. Сирӗнте - ыр пуласлӑх. Çавӑнпа чӑвашла калаҫӑр, вулӑр, аталанӑр, - тесе палӑртрӗ Геннадий Павлович театр музейӗпе паллаштарнӑ май.

Хӗллехи каникулӑн юлашки кунӗнче театрти уява ҫитнӗ Хӗл мучипе Юрпикене курсан Пушкӑртра вӗренекенсем телейпе ҫиҫрӗҫ. Юр кӗлеткипе, Соловей-Разбойник, Тигрпа Мулкач сӑнарӗсемпе вылярӗҫ, юрларӗҫ, ташларӗҫ, хатӗрленӗ сӑвӑсем каласа пачӗҫ, кучченеҫлӗ пулчӗҫ, асӑнмалӑх ӳкерӗнчӗҫ.

Кайран пурте куракансен залне иртрӗмӗр. Кунта пире «Чечеклӗ Çуралнӑ кун» юмах тӗнчине кӑтартрӗҫ. Пурне те ҫепӗҫ лӗпӗш – Серебринка (О.Ильина), чечек юратакан  ӗне – Зорька (Н.Кузьмина), ӗҫчен пыл хурчӗ – Жу-жу (ЧР тава тивӗҫлӗ артисчӗ А.Яковлев), шанчӑклӑ сысна ҫури – Нюрик (Г.Петров) сӑнарлани килӗшрӗ. Юмахри туйӑмсене нимӗнле сивӗ те шӑнтмӗ, нимӗнле вӑй та сиреймӗ…