Çутӑ ҫӑлтӑрла та капӑр чӑрӑшпа ӑшшӑн ҫитрӗ Çӗнӗ 2023-мӗш ҫул! Ку ҫула – Раҫҫей Федерацийӗн Президенчӗ В.В. Путин Хушӑвӗпе килӗшӳллӗн Раҫейри Вӗрентӳҫӗпе Вӗрентекен тата Чӑваш Республикин Пуҫлӑхӗ О.А. Николаев ҫирӗплетнипе Чӑваш Енре Телейлӗ ачалӑх ҫулталӑкӗ тесе палӑртма йышӑннӑ. Çак паллӑсене Пушкӑрт шкулӗнче «Ветерансемпе вӗрентекенсем», «Учитель-фронтовиксем», «Паллӑ вӗрентекенсем», «Пирӗн мухтавлӑ вӗренекенсем», «Çӗршыв геройӗсем» «Телейлӗ самантсем» ятлӑ стендсенче курма пулать.

 Вӗрентекенпе пӗрле шкул ачисемшӗн телейлӗ самантсем нумай. Хӗллехи каникулта та ачасем вӑхӑта усӑллӑ та хаваслӑн ирттереҫҫӗ. Кунта аслисен тӳпи куҫкӗрет. Шкулта вӗренекенсем хаваспах йӗлтӗр сыраҫҫӗ, ҫунашка туртаҫҫӗ, хальхи вӑхӑтри ларкӑчсемпе ярӑнма пухӑнаҫҫӗ. Иккеленӳ ҫук: асра юлӗ ачалӑхри самантсем, хӗллехи хаваслӑх...

Телейлӗ ачалӑх -  ачан кӑмӑлне тивӗҫтернинче те. Хамӑра килӗшнӗ пулӑмсене вӗсене каласа пани, пӗрле кинопа мультфильм пӑхни, пӗр-пӗрне пулӑшни, ыр туни – ҫакӑ веҫех ачан чӗринче йӗр хӑварать. Чӑн та, хамӑра килте е шкулта каласа панисем, кӑмӑла каякан ачалӑхри мультфильмри сӑнарсем, никама каламасӑр ырӑ ӗҫ тунисем халӗ те чун-чӗрене ӑшӑтаҫҫӗ, пурнӑҫа ҫутатаҫҫӗ, усалпа кӗрешме вӑй-хӑват параҫҫӗ.

Нумаях пулмасть ачасемпе пӗрле пухӑнса мультипликацилле фильмсем куртӑмӑр. Вӗсен теми Çӗнӗ ҫул, Хӗл мучи, ырӑлӑх… Çак темӑсемпе ҫыхӑннӑ тепӗр фильм курма тӳр килчӗ.  Чебурашкӑпа. Çӗнӗ форматлӑ пулин те, ҫапах та ҫаплипех ырӑ, тӳсӗмлӗ, ҫынна юратакан, йывӑрлӑхра пулӑшакан, ыррипе усаллине уйӑракан сӑнарпа ҫӗнӗлле паллашрӑмӑр. Сӑнарпа пӗр ятлӑ кинофильм хамӑр йӑнӑшсене тӳрлетме нихҫан та кая мар иккенне те вӗрентрӗ. Кунта Çӗнӗ ҫул ҫимӗҫӗ - цитрус, Крокодилпа Сивӗ Хӗл ролӗнче - Гена мучи, ачасемпе мӑнуксен телейлӗ шӑпишӗн укҫа-тенкӗ шел марри, анчах та мулпа шанчӑклӑ тус-юлташа улӑштарма май ҫукки вырӑнлӑ курӑнчӗҫ. Çапла вара, темле фильм та ырӑпа вӗҫленни - аслисен ачасене темле чӑрмав пулсан та, ырӑ пуласлӑха илсе тухассипе танах.